బీసీసీఐ కొత్త వ్యూహం.. ఒకేసారి రెండు భారత జట్లు.. శ్రేయస్ అయ్యర్ కెప్టెన్సీలో రెండో జట్టు!

బీసీసీఐ టీ20 ఫార్మాట్‌లో సరికొత్త ప్రయోగానికి సిద్ధమవుతోంది. అంతర్జాతీయ షెడ్యూల్స్ బిజీగా మారుతున్న నేపథ్యంలో ఒకేసారి రెండు భారత జట్లను ఆడించేందుకు భారీ ప్రణాళిక రచిస్తోంది. ఐపీఎల్ ద్వారా వెలుగులోకి వస్తున్న యువ ప్రతిభను సద్వినియోగం చేసుకుంటూ, దాదాపు 30-35 మంది ఆటగాళ్లతో బలమైన పూల్‌ను ఏర్పాటు చేయడంపై దృష్టి సారించింది. ఈ ఏడాది చివర్లో ఏషియన్ గేమ్స్, వెస్టిండీస్ టీ20 సిరీస్ ఒకే సమయంలో జరగనుండటంతో ఈ ఆలోచనకు బీసీసీఐ పదునుపెట్టింది.

ఈ ప్రణాళిక గురించి బీసీసీఐకి చెందిన ఓ ఉన్నతాధికారి జాతీయ మీడియాతో మాట్లాడుతూ కీలక విషయాలు వెల్లడించారు. "ఏషియన్ గేమ్స్, వెస్టిండీస్ టీ20 సిరీస్ రెండూ ఒకేసారి జరగనున్నాయి. కాబట్టి మనం రెండు టీ20 జట్లను ఆడించాల్సి ఉంటుంది. ఇప్పటి నుంచే 30-35 మంది ఆటగాళ్లతో కూడిన ఒక పూల్‌ను సిద్ధంగా ఉంచుకోవడం చాలా ముఖ్యం" అని ఆయన వివరించారు. రాబోయే ఐర్లాండ్ పర్యటనకు కూడా పెద్ద స్క్వాడ్‌ను ఎంపిక చేయనున్నట్లు తెలిపారు. ఈ వ్యూహం ఏషియన్ గేమ్స్ వరకు కొనసాగుతుందని ఆయన తెలిపారు. 2028 ఒలింపిక్స్‌లో క్రికెట్ కూడా భాగం కానుండటంతో భవిష్యత్తు అవసరాల దృష్ట్యా ఇది దీర్ఘకాలిక వ్యూహమని స్పష్టమవుతోంది.

ఈ ప్రణాళికకు రాబోయే ఐర్లాండ్ పర్యటన ఒక పరీక్షా వేదికగా మారనుంది. అలాగే, సెప్టెంబర్‌లో ఆఫ్ఘనిస్థాన్‌తో జరగనున్న 3 మ్యాచ్‌ల టీ20 సిరీస్‌తో యువ ఆటగాళ్ల సత్తాను పరీక్షించే అవకాశం ఉంది. బ్యాటింగ్ విభాగంలో యశస్వి జైస్వాల్, వైభవ్ సూర్యవంశీ, ప్రియాన్ష్ ఆర్య, అంగ్‌క్రిష్ రఘువంశీ వంటి యువ కెరటాలతో పాటు రజత్ ప‌టీదార్, ఆయుష్ బదోని పేర్లు పరిశీలనలో ఉన్నాయి. ఆల్-రౌండర్ల కోటాలో శశాంక్ సింగ్, అనుకుల్ రాయ్ వంటి వారికి అవకాశాలు దక్కవచ్చు. 

ఇక‌, బౌలింగ్‌లో రవి బిష్ణోయ్, ఖలీల్ అహ్మద్, ప్రసిద్ధ్ కృష్ణ, అశోక్ శర్మ, కార్తీక్ త్యాగి వంటి పేసర్లు రేసులో ఉన్నారు. వికెట్ కీపర్‌గా ధ్రువ్ జురెల్ ముందున్నాడు. ఈ జట్టుకు శ్రేయస్ అయ్యర్ నాయకత్వం వహించే అవకాశాలు ఎక్కువగా కనిపిస్తున్నాయి. మొత్తంమీద కేవలం 15 మంది ఆటగాళ్లపైనే కాకుండా, 35 మందితో ఒక బలమైన సైన్యాన్ని సిద్ధం చేయడం ద్వారా అంతర్జాతీయ క్రికెట్‌లో ఎదురయ్యే సవాళ్లను ఎదుర్కొనేందుకు బీసీసీఐ పక్కా ప్రణాళికతో ముందుకు వెళుతోంది.